نبی کی نعت لکھوں یہ کہاں مجال مجھے
خدا کرےکہ ملے یہ بھی اب کمال مجھے
قلم میں اب مرے خوشبو ہے نامِ احمد کی
میں جانتی ہوں نہ آئے گا اب زوال مجھے
یہ کیا کہ چاروں طرف ہے منافقوں کا ہجوم
میں گر رہی ہوں خداوندا اب سنبھال مجھے
اے خاکِ بطحا رگوں میں اُتر لہو کی طرح
محبتوں کے سمندر کبھی اچھال مجھے
مدینے والے سے جس دن سے ہے سوال کیا
کسی سے آتا نہیں کرنا اب سوال مجھے
ہو میری روح کے زخموں پہ سایہ ء رحمت
مرے وجود سے باہر دے اب نکال مجھے
سوائے ارضِ مدینہ کے روئے جنت کی
زمیں پہ ملتی نہیں ہے کوئی مثال مجھے
|
